ايهما افضل ( نظام باقات والسعر الثابت VS ولا نسبة الاشراف )

بشوف كتير من الأعضاء محتارين بين إنهم يتعاقدوا مع مكتب بنظام الباقات إللي هو سعر ثابت للمتر ولا نظام النسبة المئوية (cost plus percentage) على تكلفة التشطيب ... فهحاول في البوست ده أوضح مميزات و عيوب كل نظام من الاتنين.

أولاً نظام الباقات (سعر ثابت للمتر):

ده بيكون إنك بتتعاقد مع مكتب بيبقى عنده كذا باقة بتختار منها إللي يناسبك و كل باقة ليها سعر ثابت لتكلفة المتر ... النظام ده بينفع أكتر للناس إللي عايزة تشطب تشطيب تجاري و مش فارق معاهم الجانب الجمالي.

• المميزات:

1. العميل بيبقى قادر من البداية خالص يعرف هو محتاج يدفع كام بالظبط في تشطيب الشقة.

• العيوب:

1. على الرغم من إني ذكرتها في المميزات بس هي برضه في العيوب .. إن العميل بيبقى فاكر إنه عارف هو هيدفع كام بالظبط إنما في الغالب الحقيقة بتكون إن سعر المتر ده بيبقى غير شامل بنود كتير العميل هيتفاجئ بيها بعد كده زي سعر المطبخ و وحدات الأحواض و سيكوريت للشاور أو البانيو و السخانات و التكييفات ... فبعد ما بيتعاقد مثلاً على نظام ب ٢٠٠٠ ج للمتر و شقته ٢٠٠ متر فيبقى فاكر إنه محتاج ٤٠٠ ألف للتشطيب بيجي بعد ما يخلص البنود إللي في الباقة يكتشف إن لسه ١٠٠ ألف مثلاً على ما يخلص.
2. تاني عيب إن العميل معندوش حرية اختيار الخامات إللي محتاجها في بيته ... هو بيبقى مرتبط بأنواع سيراميك محددة و غير كده هتبقى تكلفة اضافية على الباقة.
3. تالت عيب إن مفيش شفافية في الأمور المادية ... العميل مش عارف كل بند اتكلف كام خامات و كام مصنعيات و أتعاب المكتب كام.
4. بما ان العميل مش عارف البنود اتكلفت كام فبيحصل مشاكل في حالة الرغبة في فسخ التعاقد ... يعني لو العميل في نص الشغل حب يفسخ التعاقد لأي سبب مش هيكون عارف هو فعلياً اتصرف كام في الشقة لحد اللحظة دي و هل هو دافع فلوس بزيادة ولا لا.

ثانياً نظام نسبة على الاشراف:

ده بيبقى التعاقد على إن أتعاب المكتب عبارة عن نسبة على إجمالي تكاليف الأعمال إللي تمت تحت إشراف المهندس أو المكتب و النسبة بتكون شاملة الخامات و المصنعيات ... و بيتم تقديم مقايسة تقديرية لتكلفة التشطيب قبل البدء في التشطيب و بتكون المقايسة قابلة للزيادة و النقصان بنسبة بسيطة أثناء التشطيب.

• المميزات:

1. العميل بيبقى عنده حرية الاختيار في كل الخامات و مش ملزم بباقة معينة ولا خامات معينة.
2. العميل بييقى عارف بالظبط كل بند اتكلف كام خامات و كام مصنعيات و اتعاب المكتب كام.
3. في حالة الرغبة في فسخ التعاقد أو خصم تكلفة بنود معينة بيبقى الموضوع سهل لأن كل بند معروف تكلفته لوحده.

• العيوب:

1. العميل بيبقى مش عارف بالظبط التكلفة النهائية للتشطيب كام.
2. لو مفيش ثقة بين العميل و المهندس دايماً بيبقى العميل شايف إن المهندس بيزود في التكلفة علشان نسبته تزيد.

طبعاً في طرق تانية للحساب زي مثلاً الاتفاق على رقم ثابت مقابل الإشراف أو في مكاتب تانية بتحسب الإشراف بالمتر أو المهندس يقدم مقايسة بأسعار البنود متحمل عليها أرباحه ...

بس أنا اتكلمت على أشهر نظامين في الوقت الحالي.